Plataforma Cívica Milenio

Nado en Ourense, doutorouse en Dereito na Universidade de Santiago de Compostela e en 1996 obtivo o Premio do Instituto Hispano-Luso de Dereito Internacional á mellor tese en Dereito internacional privado, disciplina da que é catedrático na Universidade de Vigo, onde foi Decano da Facultade de Dereito e Secretario Xeral, e da que actualmente é Delegado de Protección de Datos. É membro da Corte de Arbitraxe da Cámara de Comercio Hispano-Portuguesa e autor de numerosas publicacións, a máis recente «El Derecho internacional privado de la Unión Europea ante la Inteligencia Artificial».

Nado en Ourense, a súa curta pero intensa traxectoria está ligada ao xornal por antonomasia da cidade, La Región, así como á cadea de televisión Telemiño. Tras cursar estudos de Historia no Campus local, está a piques de graduarse en Relacións Internacionais na Universidade Pontificia de Salamanca. De carácter marcadamente ourensanista, é un gran coñecedor da historia, cultura e tradicións da provincia, das que se declara namorado e defensor. Dende o coñecido «Foro La Región», coordina un dos puntos de debate público da cidade de Ourense.

Nada en Ourense, licenciouse primeiro en Ciencias Económicas e Empresariais pola Universidade de Santiago de Compostela e, con posterioridade, graduouse en Dereito pola Universitat Oberta de Catalunya. É funcionaria da Administración Local, con categoría de Técnica da Administración Xeral, e desempeñou o posto de Secretaria-Interventora en diversos concellos da provincia. Na actualidade ocupa o cargo de Xefa do Servizo de Recursos Humanos do Concello de Ourense. Así mesmo, desenvolveu actividades profesionais no ámbito da Prevención de Riscos Laborais, na especialidade de Seguridade no Traballo, impartindo formación e asesoramento técnico a empresas. Tamén foi unha figura destacada no asociacionismo veciñal da cidade, no barrio da Lonia.